曼聯球員要求更改訓練流程　坦哈格拒妥協

曼聯早前禁制4間「抹黑」領隊坦哈格嘅傳媒參加記者會，不過無阻各大媒體繼續爆料，英國《每日郵報》披露，曼聯球員早前要求坦哈格更改依家嘅訓練流程，除咗希望有更多假期陪屋企人外，亦想預早知道未來訓練「更表」，以便安排放假節目，但要求卻被坦哈格拒絕。

《每日郵報》指出，坦哈格目前嘅訓練方法，係每個星期制定一次訓練「更表」，再視乎表現用假期作為「賞罰工具」。除咗休息時間唔多「難頂」之外，球員又因為唔知下星期嘅訓練時間，唔能夠預早安排假期嘅節目，所以早前透過華拉尼、拉舒福特、勞基梳爾、湯希頓、利辛度馬天尼斯同卡斯米路嘅「領袖團隊」向坦哈格反映。

不過，坦哈格聽到球員訴求後，未肯作出妥協，佢認為能夠效力曼聯嘅球員，都需要高度投入去達到最高水平，犧牲個人利益亦係在所難免，而訓練嘅嚴格亦係喺英超生存嘅必備條件，所以唔會對訓練內容作出放寬。