般費對利物浦停賽　認心態出事：以為好易食

曼聯喺主場吞般尼茅夫3蛋，「地獄賽程」前受到重大打擊，除周中歐聯生死戰對拜仁慕尼黑外，下場聯賽作客利物浦，更有隊長般奴費南迪斯因累積5張黃牌要停賽，呢位葡萄牙國腳賽後批評隊友心態，承認贏完車路士之後，「以為對般尼茅夫好易食」！

曼聯上仗贏車路士，表現獲一致好評，今場慘敗就令球隊由天堂跌返落地獄，般奴費南迪斯賽後表示：「今場每一樣嘢都差過上仗，當你面對般尼茅夫呢啲咁有侵略性、咁進取嘅球隊，呢個係我哋拎唔到成績嘅原因。當你諗住呢場波好易食，就會有咁嘅結果。」

屋漏偏逢連夜雨，般奴費南迪斯喺尾段敗局已定情況下，仍然因為向球證投訴而「主動申請」拎黃牌，並因累積第5面黃牌而要喺下場作客利物浦停賽。唔少球迷留言嘲笑，指般奴費南迪斯係唔想再次經歷上季作客晏菲路輸0比7嘅噩夢，所以主動拎牌停賽。