曼聯陷入「地獄賽程」有排捱
2023年12月10日 17:20
東網電視
更多新聞短片
曼聯未來4場比賽非常難踢。(Getty Images)
曼聯上場英超備受睇好情況之下，竟然主場以0比3大敗於般尼茅夫腳下，令球迷大失所望，最大鑊係紅魔鬼將面臨「地獄賽程」，隨時遭遇連敗困境。
曼聯未來4場比賽非常難踢，首先係下周三(13日)凌晨歐聯主場對拜仁慕尼黑，紅魔鬼必須贏波，加上同組哥本哈根對加拉塔沙雷打和，先至可以出線，晉級16強機會微乎其微。
曼聯惡鬥完拜仁之後，將於英超作客榜首利物浦，紅魔鬼上季喺晏菲路球場慘敗0比7，今次重遊故地，真係凶多吉少。曼聯之後英超緊接作客韋斯咸，紅魔鬼上季作客「錘仔幫」，都係輸波而回，今次同樣唔樂觀。
咁都未算大鑊，因為曼聯將於12月27日凌晨主場對大勇嘅阿士東維拉，維拉近期連贏曼城、阿仙奴，試問紅魔鬼又點招架得住。
曼聯未來4場賽程
13/12 歐聯主場Vs拜仁慕尼黑
18/12 英超作客Vs利物浦
23/12 英超作客Vs韋斯咸
27/12 英超主場Vs阿士東維拉