夏蘭特突受傷復出無期　曼城2比1反勝盧頓

近期陷入低潮嘅曼城，周日(10日)作客盧頓前突然宣布艾寧夏蘭特受傷，不過「藍月亮」喺苦戰下，仍然2比1反勝盧頓，依家4分落後榜首嘅利物浦排第4位。曼城領隊哥迪奧拿賽後指艾寧夏蘭特傷勢未明，唔肯定幾時可以復出。

曼城今仗由祖利安艾華利斯代替艾寧夏蘭特擔正，早段表現麻麻，對住盧頓嚴密布防冇乜辦法，更喺完半場前被艾迪巴奧近門頭槌攻陷。換邊後曼城加強壓力，62分鐘貝拿度施華禁區內起腳抽入追平，3分鐘後基亞利殊左路窄位再入1球，曼城3分鐘內閃電連轟2球反勝。

賽後球迷最關心艾寧夏蘭特嘅傷情，哥迪奧拿就透露：「夏蘭特嘅腳骨出現壓力性反應，上場波之後佢覺得有唔妥，所以唔能夠比賽。我唔知佢要抖幾耐，逐個星期咁觀察、逐日咁觀察，要睇下有咩情況出現。」曼城周中有場歐聯例行公事，下星聯賽主場對水晶宮，之後就會出戰世冠盃賽事。