贏波輸品！熱刺門將鬼臉羞辱威爾遜

熱刺周一(11日)喺英超打破5場不勝頹勢，清風送爽下4比1大炒紐卡素，不過賽後就被批評贏波輸品，除咗「殺人王」基斯甸羅美路再施「收山腳」外，門將古里莫維卡里奧更喺比賽中做伸脷鬼臉羞辱哥林威爾遜，賽後被該英格蘭前鋒指「唔值得受尊重」。

熱刺今仗大勝而回，比賽尾段紐卡素前鋒哥林威爾遜一次頭槌攻門，被古里莫維卡里奧輕鬆接實，但呢位意大利門將攬住個波走過哥林威爾遜嗰陣，突然伸脷扮鬼臉去嘲笑對方，引起兩邊球員爭執。哥林威爾遜賽後表示：「個龍門做鬼臉去挑釁，我認為係完全缺乏尊重。」前熱刺中堅戴臣亦睇唔過眼：「如果我輸緊1比4我都會好忟，但(維卡里奧)冇必要喺對手傷口上面灑鹽。」

除維卡里奧搞事之外，中堅基斯甸羅美路喺80分鐘亦曾施展「收山腳」，只係食黃牌被指「執到」，VAR冇介入亦受到質疑，前英超球證希斯賽後話：「我唔怪球證，因為佢視線被阻，但VAR應該出手改為紅牌，呢啲傷害性動作唔應該縱容，否則會有人嚴重受傷。」羅美路今季已經因收山腳食過紅牌停賽3場，如果再食紅牌，就要停賽4場。