曼聯新股東暗寸般費「冇品」　前途似咁？

英國富商拉特克利夫即將買入曼聯25%股份，佢近日出版嘅新書之中，亦有提到曼聯隊長般奴費南迪斯，但就暗寸呢位葡萄牙國腳場上行為「冇品」，拉特克利夫日後成為紅魔鬼話事人，恐怕般費冇運行。

拉特克利夫喺書中講到一次環太平洋旅行之中，睇過1場欖球賽事，大讚雙方球員落力比賽，相撞時簡直感到地面都在震動，結果有1位球員骨折，被抬上救護車送入醫院。同時暗寸曼聯球員比賽態度差，指曼聯上季作客以0比7大敗於利物浦腳下，般奴費南迪斯並冇被對手整到面部，但卻掩面扮痛苦。

其實拉特克利夫已經唔係第一次批評曼聯球員，佢曾於10月指卡斯米路係「問題收購」，呢2位紅魔鬼中場將來真係要打醒十二分精神。