美斯再鬥C朗！邁亞密訪港前先戰艾納斯

有阿根廷球星美斯壓陣嘅國際邁亞密，周二(12日)再宣布2場明年初嘅亞洲之旅賽程，包括2月4日喺香港對港聯前，先喺沙特阿拉伯鬥C朗拿度領軍嘅艾納斯，兩大「球王」再度碰頭肯定成為球壇熱話。

國際邁亞密明年初展開亞洲之旅，上星期率先宣布2月4日會喺香港大球場，同由港超球員組成嘅選手隊交手。呢支美職球隊周二再透過社交網宣布，將會喺沙特阿拉伯踢2場熱身賽，包括1月29日對希拉爾，2月1日再對艾納斯。

國際邁亞密總監基斯軒達臣表示：「呢啲比賽會為球隊提供重大考驗，對球隊迎接新球季大有幫助，能夠同希拉爾、艾納斯呢啲強勁對手比賽令人興奮。」據《ESPN》資料，美斯同C朗歷來35次對壘，美斯嘅球隊贏過16次，C朗嘅球隊贏過10次，2大球王對上一次碰頭，係今年1月利雅得明星隊對巴黎聖日耳門(PSG)，當時PSG贏5比4。