多蒙特擬用馬倫換辛祖　曼聯制唔制？

曼聯同多蒙特蘊釀球員交易？據德國《體育圖片》報道，多蒙特有意喺1月收購被曼聯棄用嘅查頓辛祖，並打算用前鋒當耶爾馬倫作為交易籌碼，據報呢位荷蘭國腳都係曼聯領隊坦哈格心儀球員之一，令轉會有機會達成。

曼聯希望盡快踢走查頓辛祖，而多蒙特就有意重召呢位效力過4年嘅昔日球迷寵兒，《體育圖片》指多蒙特願意用有離心嘅當耶爾馬倫作交換，呢位24歲荷蘭國腳可以勝任左翼、右翼同前鋒，而且又喺阿仙奴青年軍踢過2年，對英超並唔陌生，一直想加強鋒力嘅曼聯對佢自然有興趣。

不過，多蒙特如果想實現交易，仲要查頓辛祖願意減薪，報道指查頓辛祖目前年薪為1,400萬歐元(約1.18億港元)，比隊中最高薪球員歷卡斯蘇尼嘅1,200萬歐元(約1億港元)更高，多蒙特未必能夠承擔。