全世界留意！卡利奧斯相隔2028日有望再戰歐聯

紐卡素將於周四(14日)凌晨歐聯生死戰主場對AC米蘭，由於正選門將尼克普比受傷長抖，後備杜巴夫卡亦上陣成疑，英國《太陽報》指領隊艾迪侯域可能派出3號門將卡利奧斯把關，如果成真，就會係呢位30歲德國鋼門自2018年5月歐聯決賽「派膠」之後，相隔2028日再次喺呢項大賽上陣。

卡利奧斯5年前歐聯決賽為利物浦正選上陣鬥皇馬，但犯下2次嚴重失誤，導致紅軍輸波，卡利奧斯嘅球員生涯亦直插谷底，先後被外借去比錫達斯、林柏聯，上年夏天轉投紐卡素，並喺今年2月英聯盃決賽擔任正選，作出多次撲救，可惜紐卡素0比2不敵曼聯。

卡利奧斯今季仲未曾上陣，突然之間要佢應付今場歐聯大戰，領隊艾迪侯域無疑係一次豪賭。