史上第一人！賓施馬4屆世冠盃入波

周三(13日)凌晨世冠盃第1圈賽事，東道主沙特阿拉伯球隊伊蒂哈德以3比0大勝奧克蘭，著名前鋒賓施馬射入1球，成為史上首位喺4屆世冠盃取得入波嘅球員，強如美斯同C朗都做唔到。

伊蒂哈德開賽29分鐘由羅馬連奴勁射入網打開紀錄，僅過5分鐘，平時甚少入波嘅防守中場尼高路簡迪把握對手解圍不遠，射成2比0，跟住輪到另一位法國名將賓施馬表演，近門射入，伊蒂哈德上半場已經領先3球。

即將36歲嘅賓施馬效力皇馬期間曾於2014、16、22年世冠盃入波，加上今仗建功，創造紀錄成為首位喺4屆賽事入波嘅球員。與此同時，賓施馬喺世冠盃已累積入5球，僅次於2位前皇馬隊友C朗(7球)及加里夫巴利(6球)。

伊蒂哈德贏波之後，將於第2圈對埃及球隊艾阿里，勝方將會晉級4強對巴西勁旅富明尼斯。