李察利臣翻生創歷史　英超單季最快500球誕生

周六(16日)凌晨英超，熱刺作客以2比0擊敗諾定咸森林，前鋒李察利臣鹹魚翻生，連續2場有波入，呢位巴西國腳今場頭槌破網所入1球別具意義，因為今季英超僅進行咗161場聯賽，已經誕生第500個入波，成為呢項賽事史上單季最快出現第500球，可見各隊大踢進攻足球，絕對係球迷之福。

熱刺開賽32分鐘就有翼鋒比蘭莊臣受傷退下火線，但並冇影響球隊發揮，上半場補時，古路施夫斯基右路傳中，李察利臣頂入，佢近2場英超有3球進帳，呢球亦係今季聯賽第500個總入球。李察利臣今季為熱刺各項賽事上陣15場入5球及3次助攻，比佢上季踢35場入3球，表現脫胎換骨。

換邊之後，諾定咸森林門將馬特端納解圍失誤，被古路施夫斯基截到之後，突破殺入禁區窄角度射入。不過，熱刺中場比蘇馬70分鐘粗野踢中對手，球證睇完VAR之後，向佢出示紅牌，呢位27歲馬里國腳今季已經第2次被趕出場，幸好無阻球隊全取3分。

熱刺贏波之後追至同第4位曼城同分，但踢多對方1場。