高普將續約至2029年　人工有望同哥帥睇齊

利物浦今季愈戰愈勇，排英超榜首，根據英國媒體《indykaila News》爆料，紅軍管理層計劃同領隊高普續約至2029年夏天，年薪有望由現時1,800萬歐元(約1.53億港元)，增加至2,200萬歐元(約1.87億港元)，同英超最高薪主帥哥迪奧拿睇齊。

高普現時合約將於2026年夏天屆滿，利物浦大股東芬威體育集團非常滿意呢位56歲德國名帥表現，所以希望提早同佢續約，以穩定軍心。高普2015年10月成為紅軍主帥以來，協助球隊捧過英超、英足盃、英聯盃、歐聯、世冠盃等冠軍，堪稱球隊史上最佳領隊之一。

利物浦上季成績倒退，僅排英超第5位，失去今屆歐聯參賽資格，一度傳出高普可能離任，但佢最終頂住壓力留隊，率領利物浦捲土重來，今季創出佳續，證明會方留用高普嘅決定正確，自然想開出長約綁實呢位名帥。

值得一提，高普曾經被指有「7年之癢魔咒」，因為佢之前執教緬恩斯、多蒙特，都係大約教7年就離開，依家睇嚟佢已經打破魔咒。