格連活特1傳1射　基達菲大炒西維爾

今季被曼聯外借去基達菲嘅格連活特又有佳作，呢位22歲英格蘭翼鋒喺周日(17日)凌晨西甲，貢獻1次助攻及射入1球12碼，協助球隊作客以3比0大勝西維爾，取得今季聯賽最大勝仗。格連活特踢13場西甲已創造7個入波，包括射入3球及4次助攻，遠勝曼聯鋒線球員表現，紅魔鬼主帥坦哈格唔知有冇後悔放走呢位新星呢？

基達菲反客為主，開賽5分鐘就獲得12碼，由前鋒馬約萊爾主射入網，迅速打開紀錄，之後成為格連活特表演時間，佢使出「手術刀式」精準妙傳，由謝美馬達射成2比0。戰至80分鐘，西維爾球員喺禁區內犯手球，被吹罰12碼，今次改由格連活特主射，成功命中，贈對手3蛋。

未計今輪英超雙紅會，曼聯6位鋒線球員今季英超合共僅入4球及2次助攻，格連活特喺西甲一人已經入3球及4次助攻，可見紅魔鬼借走佢，實在係錯誤決定。

另外，西維爾喺歐聯分組賽包尾出局，加上今場西甲大敗，會方宣布解僱僅領軍2個月嘅教練迪亞高阿朗素。