最無謂紅牌！達洛治5秒連食2黃　球證被鬧爆

利物浦對曼聯嘅英超踢成0比0，「紅魔鬼」最後只有10人應戰，葡萄牙守將達洛治喺補時階段5秒內連食2張黃牌，都係因為對球證奧利華不敬，堪稱最無謂紅牌！不過奧利華今場對利物浦前鋒達雲紐尼斯就非常寬容，尺度不一而受到批評。

今仗踢到最後補時3分鐘，達洛治力逼穆罕默德沙拿出界，球證誤判界外球畀利物浦，達洛治即刻大聲抗議，換嚟1張黃牌，不過達洛治仍然唔收口，結果5秒後再被奧利華出示第2面黃牌，閃電被逐離場。不過，奧利華今仗對達雲紐尼斯就多番容忍，該烏拉圭前鋒21分鐘就拎黃牌，但佢喺鳴笛後將個波大力踢走，次後更向球證拍手同舉手指公諷刺，但奧利華都默默「吞晒」，令球迷質疑尺度不一。

賽後大批網民留言聲討奧利華：「最可恥嘅判決」、「球員連投訴嘅權利都冇」、「足球場已經唔容許球員有任何情緒」、「點解紐尼斯挑釁球證冇事，達洛治連投訴都唔得？」奧利華有「極速派牌」前科，2022年曾經喺7秒內對阿仙奴嘅加比爾馬天尼利連派2黃牌。