水晶宮防線「流血不止」　想借查洛巴救亡

水晶宮防線穿窿，近6場英超有5場失波達到2球或以上，前面入埋唔夠後面輸，若然再冇改善，隨時捲入降班旋渦。根據英國傳媒報道，水晶宮領隊鶴臣打算下月轉會市場重開後，借用車路士後衞杜利奧查洛巴堵塞漏洞。

杜利奧查洛巴因為傷患問題，今季仍然未曾上陣，預料下月可以復出，但由於呢位24歲英格蘭中堅抖得太耐，加上隊內仲有3位名牌中堅堤亞高施華、班洛特巴迪亞舒尼、阿素迪沙斯，就算杜利奧查洛傷愈，都難有上陣機會，據悉佢希望外借去其他球隊，以便重拾比賽狀態。

車仔主帥普捷天奴亦有意精簡陣容，唔介意放走呢位「冗員」，立即吸引水晶宮注意，希望借用杜利奧查洛巴以解燃眉之急。

拜仁慕尼黑教練杜曹亦想借用杜利奧查洛巴，但如果佢轉投呢支德甲勁旅，恐怕上陣時間唔會多，水晶宮實力及財力都唔及拜仁，反而更有利吸引急於獲得比賽機會嘅杜利奧查洛巴加盟。