曼聯新老闆準備大裁員　有意同辛祖解約

曼聯新股東拉特克利夫入股仲未完成，但連串改革大計已蘊釀，據報佢認為曼聯冗員過多，目前球會有超過1,100名顧員，數字遠超其他Big 6球隊，所以上場後計劃大裁員。球員買賣方面亦打算「長痛不如短痛」，將效法阿仙奴同冇用球員提前解約嘅做法，查頓辛祖隨時係第1人。

據英國《每日郵報》報道，曼聯依家受薪員工數字為1,112人，係Big 6入面最多員工嗰隊，遠高於阿仙奴(700人)、曼城(720人)等勁旅，拉特克利夫入股前作出調查，發現唔少部門都有大量冗員，所以上任後會精簡架構，減少球會不必要嘅開支。

另外，拉特克利夫打算效法阿仙奴嘅策略，對已經唔喺計劃嘅球員果斷「斬纜」，阿仙奴近年先後同奧斯爾、奧巴美揚、尼高拉斯比比等球員提前解約，寧願放棄收取轉會費，換取薪酬空間以加快重建進度。曼聯以往經常為保球員價值，就算唔啱用都會續約「保值」，結果反而影響更衣室士氣，拉特克利夫就想改變政策，消息指佢哋已同查頓辛祖初步傾談解約可能性，務求將佢盡快踢走。