阿仙奴猛將神奇康復　爭霸及時雨

阿仙奴今季喺英超、歐聯都有好成績，不過後防兵源只係「掹掹緊」，下半季展開前就收到好消息，據報夏天加盟嘅荷蘭國腳祖利安添巴，十字韌帶傷患極速康復，預計1月份可以重投操練，阿仙奴亦準備喺歐聯淘汰賽名單為佢註冊，為阿仙奴爭霸再添重要籌碼。

祖利安添巴喺今季開鑼戰十字韌帶撕裂，原本估計要到3月至4月先可以復出，但佢康復進度極佳，下月就會重投操練，最樂觀情況係1月20日對水晶宮復出，距離2月底展開嘅歐聯16強(對波圖)仲有好多時間磨練狀態。阿迪達早前透露：「添巴嘅傷患好嚴重，但佢有飛躍進展，見住佢每日練習嘅勤力，直情係難以置信！」

22歲嘅祖利安添巴接近復出，近期亦不斷參加球隊活動，日前同家人去盧旺達出席球會贊助活動嗰陣表示：「一切進展良好，我嘅膝頭反應理想，目前情況令人滿意，希望可以盡快復出。」祖利安添巴可以勝任左右閘同中堅，好使好用。