黃喜燦續約至2028年　因一事將缺陣6星期

狼隊領隊加利奧尼爾確認，前鋒黃喜燦已經同意續約至2028年夏天，但呢位27歲南韓國腳將於下月離隊出戰亞洲盃，可能缺陣6星期，加利奧尼爾透露有意簽入前鋒，填補呢段「真空期」。

黃喜燦今季表現大勇，踢16場英超入8球及2次助攻，會方早前同佢達成續約協議，綁實呢位猛將，主帥加利奧尼爾話：「我哋好滿意黃喜燦嘅表現，佢好勤力，為球隊射入唔少重要入波，好開心佢可以長期留隊。」

不過，黃喜燦將於下月為南韓出戰喺卡塔爾主辦嘅亞洲盃，呢項賽事將於下月12日至明年2月10日舉行，如果南韓打入決賽，加上黃喜燦參賽前備戰，以及賽事結束後需要休息，好可能有6星期無法為狼隊上陣。

加上中場保巴卡查奧爾、後衞艾洛利下月亦要離隊踢非國盃，加利奧尼爾表示有意下月簽入「替工」，目標包括捷克球隊柏辛域陀尼亞前鋒杜羅辛美，呢位20歲新星身高1米92，步大力雄應該適合狼隊踢法。