格流大鑊　2位射手下月或離隊踢非國盃

格拉斯哥流浪現時正在追趕榜首些路迪，但球隊面臨重大隱憂，因為2位射手艾比達拉施馬、迪沙斯好大機會下月初離隊踢非洲國家盃，勢必削弱攻力，未來4場聖誕新年快車，趁2人仍在陣，必須全力爭勝搶分。

塞內加爾國腳艾比達拉施馬今季被白禮頓外借去格拉斯哥流浪後，表現神勇，各項賽事上陣29場入14球，成為格流首席射手，如無意外將會入選塞內加爾大軍名單。至於另1位前鋒迪沙斯同樣今季加盟格拉斯哥流浪，呢位29歲尼日利國腳上陣27場入9球，若然2人一齊離隊1個月踢非國盃，格拉斯哥流浪日子肯定難捱。

非國盃各支參賽球隊需於下月3日或之前，提交最終27人大軍名單，迎接下月13日展開嘅決賽周賽事。

格拉斯哥流浪喺非國盃開始前，仲有4場聯賽，包括對馬瑟韋爾、羅斯郡、些路迪、基爾馬諾克，當中以12月30日晚作客些路迪最為重要，艾比達拉施馬、迪沙斯仲可以踢埋呢場大戰，先至離隊為國出征，總算係不幸之中嘅大幸。