17歲「新美斯」誕生　掀起3大豪門爭奪戰

阿根廷人才輩出，17歲新星艾捷華利喺今屆U17世少盃表現一鳴驚人，上陣7次射入5球及1次助攻，協助阿根廷打入4強，被譽為「新美斯」，3大豪門巴塞隆拿、曼城、車路士都計劃簽入呢位未來球王。

身高1米71嘅艾捷華利司職進攻中場，加上身穿阿根廷U17青年軍10號球衣及擔任隊長，踢法同身型同美斯非常相似，其中今屆世少盃8強對巴西，艾捷華利上演帽子戲法，協助球隊大炒宿敵3比0，盡顯大賽球員風範，所以就佢算入波數字，唔及以8球獲得神射手嘅隊友奧斯甸羅拔圖，但仍然獲得較高評價。

由於巴塞隆拿好希望再獲得1位類似美斯嘅天才球員，所以願意斥3,000萬歐元(約2.58億港元)向河床收購艾捷華利，比佢現時毀約金多500萬歐元(約4,300萬港元)，可見誠意十足。不過論財力，曼城、車路士遠勝一籌，有力開出更高價錢搶人，並且兩隊分別擁有阿根廷國腳祖利安艾華利斯、安素費南迪斯，可以充當說客，最終鹿死誰手，大家拭目以待。