黃喜燦起孖今季入10球　半場傷出奇哥嚇餐死

南韓前鋒黃喜燦今季英超大爆發，周四(28日)凌晨聯賽作客賓福特，黃喜燦梅開二度帶領狼隊大勝4比1，亦令呢位南韓前鋒今季英超累積10球進帳。不過，黃喜燦喺完半場前被撞傷腰部，提早退下火線，南韓領隊奇連士文嚇餐死。

今場雙方節奏明快，狼隊13分鐘由勒美拿先開紀錄，1分鐘後主隊中堅彌敦哥連斯回傳乏力，黃喜燦截到後輕鬆射入。賓福特16分鐘靠尤尼韋沙閃電追番1球，但黃喜燦28分鐘個人表演射成3比1。黃喜燦完半場前因傷退下火線，但79分鐘仍憑比拿加迪錦上添花，大勝4比1完場。

黃喜燦今季英超已入10球，係球會史上第3個單季獲得雙位數入球球員，佢即將會返南韓國家隊備戰亞洲盃，半場傷出令人擔心，不過黃喜燦賽後就派定心丸：「我相信唔係咩嚴重受傷，一切OK，好開心我再次入波。」狼隊喺英超歷史最高單季入球係15球(2019年魯爾占美尼斯)，黃喜燦大有機會打破紀錄。