冇得救！積遜又錯失單刀　車路士1月簽前鋒

車路士周四(28日)凌晨主場2比1力克水晶宮，不過前鋒尼高拉斯積遜嘅表現繼續令人失望，佢喺下半場再次錯失單刀機會，之後入波又因越位在先食詐胡。唔少車路士球迷都指呢位前鋒「冇得救」，據報球隊打算喺1月收購施斯高頂替。

尼高拉斯積遜今季失機頻頻，上場對狼隊已經連環糟蹋黃金機會，今仗繼續獲普捷天奴委以重任，可惜繼續敗家演出，74分鐘仲係1比1嗰陣，尼高拉斯積遜接應干拿加歷查直線成單刀，點知佢笠射竟然射咗去柱邊出界。大批球迷賽後留言批評「英超史上最差前鋒」、「世上有3樣嘢係無可避免，交稅、死亡同尼高拉斯積遜失機」。

據《The Athletic》報道，車路士已經將1月買前鋒列為首要任務，不過佢哋心儀嘅域陀奧森漢同艾雲東尼，預計轉會費都要1億鎊，所以車路士已物色其他代替人選，效力RB萊比錫嘅施斯高就係目標之一。