昔日神童被摩連奴「彈鐘」　提前送返PSG

葡萄牙中場球星連拿度辛捷士，今夏由巴黎聖日耳門(PSG)外借羅馬，不過佢嘅表現就令人失望，近期更被摩連奴打入冷宮，據報羅馬已經同PSG交涉，希望提前終止借用，騰出薪酬空間喺冬季轉會市場再搵救兵。

26歲嘅連拿度辛捷士，喺賓菲加出道嗰陣被譽為神童，但經歷多次轉會都打唔起，今季外借羅馬同樣令人失望，上半季只試過1次正選，更多次被摩連奴批評，最經典係月中對博洛尼亞一仗，後備上陣18分鐘後再被換出，羅馬上仗對拿玻里，連拿度辛捷士連大軍名單都未能入圍，可見佢已被放棄。

據報羅馬正同PSG商討提前終止借用，因為連拿度辛捷士嘅高昂人工，阻礙羅馬1月增兵嘅空間，而連拿度辛捷士近日亦將自己IG嘅介紹，刪除晒所有同羅馬有關嘅資訊，相信佢嘅意甲生涯將告一段落。