養傷冇影響前途　富安健洋將獲續長約

阿仙奴後衞富安健洋今季表現出色，即使現時仍在養傷之中，但兵工廠已計劃同呢位25歲日本國腳續約至2028年，證明領隊阿迪達已經視佢為防線骨幹人物

富安健洋2021年夏天以1,600萬鎊(約1.6億港元)轉會費，由意甲球隊博洛尼亞加盟阿仙奴，前2季只屬於副選球員，今季獲得重用，各項賽事上陣19場，唔止防守穩陣，並有不俗助攻能力，包括主場對錫菲聯射入1球，另外有3次助攻，表現攻守兼備，一度取代賓韋特，成為阿仙奴右閘首選，可惜12月初對狼隊一役受傷，一直缺陣至今。據悉富安健洋嘅傷勢已經接近痊愈，有望下月8日凌晨英足盃復出對利物浦。

由於富安健洋只剩下1年半合約，阿仙奴管理層希望盡快同佢續約，令佢專心為球隊搏殺，預料最少綁實呢位鐵衞至2028年夏天。不過，富安健洋將會為日本出戰下月12日展開嘅亞洲盃，意味有1個月時間未能為兵工廠披甲。

另外，阿仙奴已經拒絕水晶宮下月收購前鋒尼基迪亞嘅要求，領隊阿迪達認為有必要保持充裕人腳應付下半季，但唔排除明夏賣走呢位24歲英格蘭國腳。