曼聯最差收購　「0021」安東尼仲要傷埋

曼聯喺英超1比2不敵諾定咸森林，翼鋒安東尼馬菲奧斯被各大傳媒評為今場表現最差球員，呢位轉會費高達8,700萬鎊(約8.7億港元)嘅巴西國腳今季各項賽事上陣21次0入波0助攻，今仗仲要傷出，紅魔鬼史上最差收購非佢莫屬。

安東尼馬菲奧斯2022年夏天由阿積士加盟曼聯後，表現一直備受批評，今季演出進一步下滑，為紅魔鬼踢21場比賽，冇入波亦冇助攻。單計2023年英超賽事，呢位23歲翼鋒踢33場聯賽僅入1球，而且已經係4月對諾定咸森林，今仗同樣對森林，安東尼馬菲奧斯踢咗54分鐘就傷出。

曼聯名宿舒米高都睇唔過眼，認為領隊坦哈格必須重新考慮安東尼嘅位置，其實曼聯早前反勝阿士東維拉，坦哈格收起安東尼，改由阿歷真度加拿祖踢右翼，效果唔錯，但今場又用番安東尼出任正選，輸波可以話係咎由自取，難怪唔少紅魔球迷希望安東尼今次可以養傷多一段時間，球隊或者有救。