利物浦名宿撐敗家紐尼斯：無人完美！

利物浦前鋒達雲紐尼斯嘅射術一直受到批評，上場對般尼打破入球荒，只係佢今季18場聯賽第5球，唔少單刀、空門都出現蝦碌場面，不過「紅軍」名宿班尼斯早前受訪，就指達雲紐尼斯表現已經非常全面，球迷要接受佢「射術欠奉」嘅缺點。

班尼斯表示：「達雲紐尼斯好勤力、勇敢兼樂於幫助球隊，如果佢有埋舒利亞、科拿或者艾寧夏蘭特嘅射術，佢就會係世界最佳球員。達雲紐尼斯喺前線做支點作用好大，而且鬥志十足同不斷協防，我覺得佢嘅表現冇問題。」

對於入球數字偏低，班尼斯更舉例叫球迷接受現實：「如果當年拿鐵斯有滿場飛嘅運動力，佢會值5億鎊；如果雲尼鍾斯有埋頂級球技，身價至少2億鎊。達雲紐尼斯有其他球員欠缺嘅運動力，針無兩頭利，如果佢乜都有，利物浦就唔會買到佢啦。」