沙拿換砵轉腳風　創入球里程碑並肩4大傳奇

穆罕默德沙拿為利物浦踢完對紐卡素一戰後，將會返埃及國家隊出戰非國盃，暫別「紅軍」前交出2入波1助攻作為禮物，除咗幫利物浦全取3分外，佢為利物浦喺英超亦累積入咗151，成為史上第5位為單一球會入150+球嘅英超球員。

利物浦上半場狂攻食白果，穆罕默德沙拿更曾12碼宴客，結果佢半場決定換波砵，成功轉變腳風。呢位埃及前鋒表示：「我唔係迷信，我經常都着唔同波砵比賽，但如果呢個諗法(腳風唔順)出現喺腦中，咁咪轉第二對囉！」穆罕默德沙拿為利物浦累積151個入球，係英超史上第5人(單一球會)，同亨利(阿仙奴)、朗尼(曼聯)、阿古路(曼城)同哈利卡尼(熱刺)睇齊。

除咗轉波砵扭轉腳風外，穆罕默德沙拿亦唔想喺踢非國盃前留有遺憾：「上半場入唔到波，大家都覺得要保持冷靜，我射失咗12碼，我心諗『返國家隊之前係咪要交呢種表現？』當然唔係啦！所以我更加專注，更加落力去改變戰局，最終拎到一個偉大戰果。」