真愛！高基減薪5成效忠馬德里體育會

馬德里體育會目前財政困難，同主力續約問題上亦出現問題，隊長高基等多位球員嘅合約到季尾完結。據報馬體會已向高基開出新約，但人工要狂減50%，會長施里蘇透露高基決心留隊，接受減薪簽約只係時間問題。

據西班牙《阿斯報》消息，高基目前年薪高達1,600萬歐元(約1.38億港元)，係全西甲第2高薪嘅西班牙籍球員，不過馬體會嘅人工預算已達極限，據報開出嘅新約人工只係得番一半，高基目前仍未回應，不過會長施里蘇信心十足表示：「我哋即將再安排會面，到時我就可以宣布佢續約。」

31歲嘅高基2000年加入馬體會青訓，2009年正式出道後，至今為馬體會上陣670場，一直係教練施蒙尼嘅戰術核心。呢位西班牙國腳季初亦表示希望喺馬體會踢到收山，係現今球壇罕見嘅忠心球員。