夏蘭特獲挪威金球獎　有望復出鬥紐卡素

曼城前鋒艾寧夏蘭特繼早前獲得由國際足球歷史與統計聯合會(IFFHS)評選出2023年最佳球員之後，又有獎落袋，奪得代表挪威最佳球員嘅「挪威金球獎」，亦係呢位23歲射手連續4次獲此殊榮。

艾寧夏蘭特將自己同獎座嘅合照放上社交網話：「好榮幸可以再次獲得呢一個獎項。」網民紛紛大讚佢表現，認為2024年金球獎應該都會成為夏蘭特嘅囊中之物。不過，艾寧夏蘭特自從上月初英超對阿士東維拉受傷後，一直缺陣，並錯過世冠盃賽事，到底佢幾時可以復出備受關注。

根據曼城會方最新嘅傷兵消息，艾寧夏蘭特有望復出踢1月14日凌晨英超作客紐卡素，但周日(7日)晚英足盃主場對哈特斯菲爾德，仍然唔使預佢。

至於曼城另外2位傷兵奇雲迪布尼、謝利美杜古，情況比較理想，有機會一齊復出對哈特斯菲爾德。