雲比沙卡打爭氣波　獲曼聯續約

曼聯近期積極出手同球員續約，繼中堅域陀連迪路夫獲延長1年合約至2025年6月之後，右後衞雲比沙卡亦獲得相同待遇，呢位26歲英格蘭球星曾經一度面臨被領隊坦哈格放棄，但憑出色表現，依家獲得續約，成功演繹勵志故事。

雲比沙卡2019年夏天以5,000萬鎊(約4.9億港元)轉會費由水晶宮加盟曼聯，原本屬於紅魔鬼主力，但坦哈格接手執教之後，一度將佢打入冷宮，甚至有意出售呢位右閘。幸好雲比沙卡過去1年表現回穩，一對一防守特別出色，因而重新獲得坦哈格歡心。

根據「轉會權威」記者羅曼諾(Fabrizio Romano)爆料，曼聯會方今次係啟動合約中優先續約1年條款，完成相關程序之後，將準備進一步同雲比沙卡傾續長約。

除咗域陀連迪路夫、雲比沙卡之外，預料曼聯下一步係同中場新星米積伯利續約，然後將佢外借去其他球隊。