法明奴打算重返英超　富咸錫菲聯二揀一

羅拔圖法明奴上年夏天離開效力咗8年嘅利物浦，加盟沙特阿拉伯球隊吉達艾阿里，但發展唔如意，根據英國媒體《talkSPORT》爆料，呢位32歲巴西前鋒打算重返英超，最大機會加盟富咸或者錫菲聯。

羅拔圖法明奴自從上年8月首場沙特聯賽上演「帽子戲法」入3球之後，跟住一直食白果，近期已經失去正選位置。屋漏偏逢連夜雨，法明奴上年11月更加經歷喪父之痛，令佢喺沙特阿拉伯生活得唔開心，打算離隊並重返英超。

富咸現時正在物色1位經驗豐富前鋒，羅拔圖法明奴無疑係唔錯人選，加上隊內有4位巴西球員，有助法明奴融入球隊。另外，錫菲聯需要增兵護級，如果簽到羅拔圖法明奴，應該幫到手。