答謝功臣　維拉開「肥約」利誘里安拜尼續約

阿士東維拉今季成績出色，排英超第2位，僅落後榜首利物浦3分，翼鋒里安拜尼功不可沒，會方計劃提早開出「肥約」同呢位26歲牙買加國腳續約，令佢成為球隊高薪一族。

里安拜尼2021年夏天以2,500萬鎊(約2.5億港元)轉會費，由利華古遜加盟阿士東維拉，雖然上季英超僅入4球，但今季表現大爆發，踢18場聯賽已經入6球及5次助攻，引來唔少大球會注意。

里安拜尼只剩下1年半合約，維拉方面不敢怠慢，希望盡快同佢續約，加人工在所難免，里安拜尼現時周薪為10萬鎊，如果佢續約，應該可以獲得13萬鎊周薪，同門將達米安馬天尼斯、前鋒奧尼屈堅斯、中堅泰朗明斯等隊內高薪一族睇齊。

里安拜尼上仗英超對般尼射入1球，賽後佢話：「好開心球隊位於正確軌道上，希望盡力為球隊比賽，獲得最佳成績，維拉幾時需要我，我都會喺度。」言下之意，里安拜尼應該好大機會同意續約留隊。