艾歷迪亞同拜仁達協議　轉戰德甲

拜仁慕尼黑今季簽入哈利卡尼，表現出色，冬季轉會窗將會再出手，斟介熱刺後防老臣子艾歷迪亞，據報雙方已達成個人協議，至於熱刺亦唔會強留，只要搵到替代人選，就會放人。

《Football Insider》報道，拜仁同艾歷迪亞已達成協議，該29歲後衞今季在熱刺失去正選位置，半季僅上陣4場，由於佢合約季尾到期，如果熱刺依家拒絕放人，季尾就會自由身離隊。

艾歷迪亞效力熱刺10個球季，由於今季長坐冷板，已決定轉投拜仁，仲可以同舊隊友哈利卡尼重聚，熱刺目前積極物色後防人腳，目標人物有熱拿亞中堅達古辛，如果斟介順利，就會放艾歷迪亞離隊。