巴西名帥薩加奴去世　享年92歲

巴西傳奇名帥薩加奴，周六(6日)在家中去世，享年92歲。佢既係「球王比利」好友，更係史上唯一以球員及教練身份4次奪得世界盃人物。

薩加奴曾6次出席世盃，1958及1962年以球員身份捧盃，1970、1974、1994、1998年世盃則以領隊或助教身份出席，當中1970年以領隊身份奪冠，1994年以助教身份捧盃，巴西曾5次奪得世盃，其中4次同薩加奴有關。

世盃歷史上有3人先後以球員及教練身份贏得冠軍，薩加奴係第1位，之後有碧根鮑華同迪甘斯完成壯舉，1994年巴西奪冠後，薩加奴集齊雷米金盃及大力神盃兩個不同年代世盃獎座，獲「教授」稱號。

隨着薩加奴離世，1958年世盃冠軍巴西隊功臣全部仙遊，曾在薩加奴麾下作戰嘅「大哨」朗拿度表示：「佢係一代最偉大巴西球員之一，4次贏得世盃後，在巴西足球上留下永久印記。」