迪布尼復出交靚助攻　哥帥：佢係贏波鎖匙

因傷缺陣近5個月嘅奇雲迪布尼，周日(7日)英足盃第3圈終於復出，呢位比利時中場後備上陣，只係用17分鐘時間就交出靚助攻，協助曼城主場5比0大炒哈特斯菲爾德。曼城領隊哥迪奧拿賽後表示，奇雲迪布尼係球壇少數嘅「贏波鎖匙」。

曼城拎完世冠盃後全面回勇，今仗主場對英冠球隊更加予取予攜，上半場由菲爾科頓同祖利安艾華利斯入波；57分鐘奇雲迪布尼久保復出，1分鐘對手即擺烏龍，加上菲爾科頓喺65分鐘攻入個人第2球拉開紀錄。表現活躍嘅奇雲迪布尼74分鐘交出靚助攻，底線傳中畀謝利美杜古抽入，曼城大勝5比0晉級。

哥迪奧拿賽後對奇雲迪布尼大讚有加：「我哋非常興奮見到佢復出，奇雲迪布尼可以幫球隊獲勝，呢個世界有少數球員做到，奇雲迪布尼、艾寧夏蘭特呢啲球員係贏波鎖匙。」曼城捧世冠盃後，返英國取得3連勝，下仗會喺14號聯賽作客紐卡素。