利物浦獲11日歇冬　雲迪積克復出鬥富咸

利物浦喺英足盃淘汰阿仙奴，避免重賽可以話係最完美結果，領隊高普表示周四(11日)凌晨對富咸後，將會安排歇冬計劃畀球員叉電，傳聞可能會出國集訓。至於今仗因病缺陣嘅華基爾雲迪積克，高普預計佢有望趕及復出對富咸。

利物浦自12月開始賽程緊密，踢完英足盃後，周四又要喺英聯盃4強作客富咸，由於利物浦唔需要重賽，踢完英聯盃後有11日「歇冬」，直到22號先至對般尼茅夫。高普對此表示歡迎：「阿仙奴尾段想追平，但和波(重賽)係我最唔想要嘅結果，依家我哋終於有得歇冬，我要開始計劃。」阿仙奴將會拉隊飛去杜拜集訓，有傳利物浦亦考慮出外集訓，上季季中世盃休戰期，利物浦亦曾去杜拜集訓。

「紅軍」目前有唔少球員缺陣，對阿仙奴因病冇踢嘅華基爾雲迪積克，據報有望復出砌富咸，高普賽後表示：「好少見到雲迪積克病到貓樣咁，但佢今日就係咁，所以我哋畀佢返屋企。我希望佢可以復出對富咸，但我唔肯定。」