曼聯2位「玻璃腳」復出冇耐又受傷

曼聯喺英足盃以2比0擊敗韋根，翼鋒阿密特迪亞路、中場基斯甸艾歷臣都冇份入選大軍名單，原來2人又再次受傷，令紅魔鬼今季球員受傷次數增加至38人次。

阿密特迪亞路上年8月初因為膝部受傷，直至上月底英超對諾定咸森林先至復出，當時佢只係後備上陣踢咗大約40分鐘，但近日又再次受傷，未知需要抖幾耐。

至於基斯甸艾歷臣上年11月中受傷，曾經休息超過1個月，過去2場都踢正選，今仗因傷缺陣，令曼聯現時傷兵多達12人。

領隊坦哈格早前表示，多位傷兵可以喺1月復出，但話口未完又增添2位「十字兵」，恐怕會打亂呢位荷蘭名帥嘅部署。