英聯盃4強車路士鬥米堡 免費台直播
2024年01月09日 17:02
東網電視
更多新聞短片
![](/hk/bkn/cnt/sport/20240109/photo/bkn-20240109170238540-0109_00882_001_01p.jpg?20240109170238)
英聯盃4強首回合,米杜士堡主場火併車路士。
英聯盃4強首回合,米杜士堡主場火併車路士。米杜士堡係今屆4強唯一非英超球隊,實力同其餘3隊有距離,佢哋上場英足盃越級挑戰阿士東維拉,就失敗慘遭淘汰,今晚就算有地利都難有作為。「藍戰士」狀態回勇,加上近年對低組別對手甚少甩拖,可望反客為主,客勝值得支持。(HOY TV 77台周三凌晨4時直播)
車路士今季處於重組階段,演出無疑令球迷失望,但經過半季嘅磨合後,近期演出慢慢穩定落嚟,上場英足盃主場4比0大炒普雷斯頓,錄得今季第二次3連勝走勢。以高爾彭馬、史達寧同梅迪歷為首嘅攻擊線開始擦出火花,近期表現愈踢愈好,近3仗攻入9球,火力回復應有水平。
事實上車仔球員質素唔使懷疑,面對低組別球隊甚少失手,連同啱啱淘汰英冠嘅普雷斯頓,車仔已經連續28場本土盃賽對低組別球隊不敗。再者,呢支倫敦球會往績上亦食住米杜士堡,過去9次交手車路士全部贏晒,而且9場都係「派蛋」而回,擺到明格食格。
米杜士堡今屆殺入英聯盃4強有啲運仔,佢哋晉級過程從未遇上英超球隊,而且球隊近期狀態麻麻,近4場比賽3度落敗,加上塞內加爾門將辛尼迪安、澳洲「孖寶」拉利麥基爾同森姆施華拿,同樣要離隊踢非國盃及亞洲盃,前中後3線實力大打折扣,遇上近期「踩晒油」嘅車仔,主場亦凶多吉少,直取客勝穩陣。