「美斯朋友隊」再添一員？古天奴有望加盟邁亞密

菲臘比古天奴上年9月被阿士東維拉外借去卡塔爾球隊艾杜哈尼之後，表現仍然低沉，面臨被退貨，根據英國《每日郵報》爆料，呢位31歲巴西中場好可能今個月重返維拉，但領隊艾美利冇打算留用佢，古天奴隨時去美職搵食，加盟國際邁亞密，同昔日巴塞隆拿隊友美斯再度合作。

菲臘比古天奴加盟艾杜哈尼4個月，僅於聯賽上陣6次入2球，艾杜哈尼成績亦欠佳，聯賽12支球隊之中僅排第6位，無意繼續借用古天奴。維拉主帥艾美利亦早已經放棄呢位曾效力國際米蘭、利物浦、巴塞隆拿、拜仁慕尼黑嘅球星，就算佢今個月歸隊，都會繼續將佢外借，甚至出售。

據悉2支美職球隊國際邁亞密、洛杉磯銀河都有興趣簽入菲臘比古天奴，當中以國際邁亞密成事機會較大，因為會方近年專簽巴塞舊將，包括美斯、布斯基斯、佐迪艾巴，蘇亞雷斯早前亦加盟，古天奴應該比較有興奮同呢班舊隊友合作。