唔識入波就轉型　紐尼斯成「後備助攻王」

利物浦前鋒達雲紐尼斯今季表現提升，表現活躍對全隊貢獻極大，唯獨把握力一直係「死穴」。不過呢位烏拉圭國腳唔識入波就轉型，英聯盃對富咸後備上陣交出2個助攻，今季第10次助攻成為「紅軍」助攻王，而且今季已7次以後備身份製造入球，做「後備殺手」啱晒佢！

達雲紐尼斯嘅射術唔掂係公開秘密，今仗對富咸雖然只係後備上陣，但有4次射門、12次對方禁區掂波，預期入球(xG)係全場最高嘅0.76球，可惜一粒都入唔到，貫徹敗家作風。不過，達雲紐尼斯偏偏交出2次助攻成為贏波功臣，成為陣中助攻王外，今季利物浦30個由後備製造嘅入球，佢就有3個入波同4次助攻獨佔7球，成為利物浦後勁強勁嘅重要原因。

利物浦領隊高普賽後亦大讚達雲紐尼斯：「佢踢得非常好，球員係咪踢正選唔單止睇佢入唔入到波，我對佢好有信心。我唔知點解釋達雲紐尼斯依家嘅情況，佢喺射門方面真係冇得再黑仔，但我好鍾意佢嘅反應，除咗冇波入，佢今場做足晒所有嘅事。」