【官宣】辛祖狂錫多蒙特隊徽　明寸坦哈格

曼聯周四(12日)宣布，英格蘭翼鋒查頓辛祖外借德甲多蒙特至季尾，呢位23歲翼鋒加盟後即刻落場練習，雖然佢冇提及「曼聯」，但佢對住鏡頭狂錫多蒙特隊徽，就引起曼聯球迷不滿，而且一句「期待帶住笑容踢波」，亦被指係表達對效力曼聯呢段日子嘅不滿。

查頓辛祖簽約多蒙特至季尾，並且獲安排做「10號仔」，據報合約並冇加入買斷條款，意味夏天仍然要重返曼聯。季初被曼聯領隊坦哈格批評練波態度差，查頓辛祖加盟後即換訓練衫落場，顯示佢態度認真一面。多蒙特拍攝佢加盟情況嗰陣，查頓辛祖更不時狂錫多蒙特隊徽，唔少曼聯球迷留言：「從未見過佢錫曼聯隊徽」、「其實佢仲係曼聯球員嚟」、「二五仔」......

對於重返多蒙特，查頓辛祖興奮表示：「當我入到多蒙特更衣室，我覺得好似返屋企一樣，我熟悉呢間球會嘅一切，急不及待想同隊友見面、一齊落場比賽，期待可以帶住笑容咁踢波，入波、助攻同幫多蒙特爭取歐聯參賽資格。」