馬迪爾2項條件未達標　幫曼聯慳1.4億

安東尼馬迪爾即將被曼聯清洗，今個冬窗唔走，嚟緊夏窗都會離隊，據報原來佢2015年由摩納哥加盟曼聯，附帶3項條件，當中只有1項條件成功觸發，另兩項就無法達成，結果幫曼聯慳番1,440萬鎊(約1.43億港元)。

安東尼馬迪爾2015年由摩納哥轉投曼聯，當年轉會費3,600萬鎊，另加浮動獎金，而該浮動獎金分為3筆款項，各720萬鎊，第1筆獎金早就觸發，安東尼馬迪爾喺曼聯9季上陣317場入90球，摩納哥已經袋咗720萬鎊。

至於第2同第3筆獎金，摩納哥就冇可能收到，因為第2筆獎金嘅觸發條件，係安東尼馬迪爾加盟曼聯頭4年，為法國隊上陣超過25場，好明顯佢做唔到。

最後1項獎金嘅觸發條件就係，安東尼馬迪爾獲得金球獎，呢樣更加冇可能。所以曼聯最終向摩納哥繳付轉會費為4,320萬鎊，慳咗1,440萬鎊。