美斯巡演首站滯銷　香港站不保證出場

國際邁亞密以美斯招徠，2024年展開全球巡迴表演賽，總共踢7場之多，但係首站即遇上門票滯銷尷尬情況，主辦單位面臨虧蝕，至於香港站方面，有報道指，原來合約冇包美斯肯定上陣，到時美斯失場就大鑊啦。

先睇國際邁亞密巡迴表演賽行程，由1月中至2月中共分7站，對手計有薩爾瓦多、FC達拉斯、希拉爾、艾納斯、香港隊、神戶勝利船同紐維爾舊生。

今次巡演首站薩爾瓦多，合約保證美斯至少上陣20分鐘，但門票照樣滯銷，距離開賽1星期，門票僅售出3成，報道指主要原因係成本太高同門票太貴，國際邁亞密出場費為350萬美元，不過當地球迷無法負擔最高200美元(約1,560港元)票價，票房慘淡面臨虧蝕。

雖然香港站門票火速售罄，但有個大問題，就係合約冇包美斯必定登場，據報香港站合約僅承諾「大牌球員」會登場，但國際邁亞密嘅球星仲有布斯基斯、蘇亞雷斯等，無法保證美斯一定會上陣。