賠償金獵人！摩連奴6次被炒袋8000萬鎊

「寸王」摩連奴周二(16日)被羅馬炒魷，對佢嚟講絕對唔係咩罕見奇事，因為今次已經係呢位葡萄牙名帥第6次被炒魷，據英國《每日郵報》報道，摩連奴將獲得羅馬賠償餘下半年合約總值300萬鎊(約3,000萬港元)嘅遣散費，而「寸王」生涯6次拎炒魷賠償金，總額達到8,000萬鎊(約8億港元)！

摩連奴個招牌響噹噹，教親都係名牌球隊，不過佢「寸爆」、「火爆」作風就冇幾多人頂得住，喺曼聯、皇家馬德里、熱刺、羅馬同2次執教車路士都係被炒魷收場，但每次都「豬籠入水」，最「和味」嗰次係2018年12被曼聯炒魷，當時佢同球會續約冇耐，獲賠1,960萬鎊賠償金。

另外，摩連奴2次被車路士炒魷，加埋拎到2,630萬鎊，畀皇家馬德里炒魷拎到1,700萬鎊、執教熱刺17個月後被炒又獲賠1,500萬鎊，6次炒魷賠償金總額超過8,000萬鎊。報道指同屬「賠償金獵人」嘅意大利領隊干地，累積總額都只得3,700萬鎊，完全唔係摩連奴個Level。