軒達臣提前離開集訓營　加盟阿積士好事近！

英格蘭球星佐敦軒達臣上年由利物浦轉投伊蒂法克，經歷半季後萌生去意，據報佢一直向球會施壓要求放人後，伊蒂法克態度軟化，佐敦軒達臣周二(16日)已離開球隊喺杜拜嘅集訓營，權威記者Fabrizio Romano亦證實佐敦軒達臣有望加盟阿積士！

英國《泰晤士報》報道，佐敦軒達臣周二提前離開伊蒂法克喺杜拜嘅集訓營，飛返英國屋企為轉會籌劃，不過重返歐洲落腳地可能唔係英超，Fabrizio Romano周三(17日)報道：「阿積士好有信心簽佐敦軒達臣，談判已經去到深入階段，暫時未有轉會共識，但阿積士好有決心，交易火熱進行中。」

佐敦軒達臣曾公開批評沙特阿拉伯嘅人權狀況，所以上年轉去沙特落班「搵銀」，引嚟各界批評，估唔到只係半季就後悔，據報呢位33歲中場今次重返歐洲，將要接受減薪高達8成。