軒達臣赴阿積士體測　沙特白踢半季1蚊都冇

英格蘭球星佐敦軒達臣落實重返歐洲！權威記者Fabrizio Romano報道，軒達臣同阿積士已就轉會達成協議，將會簽約至2026年夏天(2年半合約)，佢周四(18日)即啟程去荷蘭做體測。據英國傳媒報道，軒達臣喺沙特踢咗半季，原來從未出糧，依家離隊後更唔會再收到錢，等如「白踢」半年！

據《每日電訊報》報道，軒達臣喺伊蒂法克雖然有35萬鎊(約350萬港元)周薪，但出於稅務問題，人工一直延遲發放，至今仍然未有1蚊落過袋，但佢因為希望重返歐洲，近日親自同伊蒂法克談判，成功獲球會答應免費放人，消息指其中一個條件，就係放棄仍未發放嘅人工，意味上半季做咗「免費勞工」。

33歲嘅軒達臣上年加盟伊蒂法克嗰陣，表示係一個好機會幫助沙特聯賽發展，結果佢踢嘅19場只得6場勝仗，消息指家人未能適應亦係佢急於離開嘅重要原因，有報道指軒達臣老婆因為衣着問題，經常被當地人指指點點，而且居住環境、交通、天氣等都未能適應，所以軒達臣要不惜一切重返歐洲。