【官宣】謝拉特教到一鑊粥　照獲續約2年

謝拉特上年7月加盟沙特球隊伊蒂法克，雖然大灑金錢引入多名球星，不過球隊成績就令人失望，近日連核心人物佐敦軒達臣都選擇解約「跳船」。勢估唔到，教到一鑊粥嘅謝拉特唔單止冇被炒，周四(18日)仲同伊蒂法克續約到2027年。

謝拉特季前重金收購佐敦軒達臣、韋拿杜姆、穆沙迪比利、迪馬雷格雷等球星，但依家只排聯賽第8位，而且正經歷9場不勝，期間只入過3球，加上王牌球星佐敦軒達臣突然離隊，有傳謝拉特嘅帥位都岌岌可危，點知劇情大反轉，伊蒂法克竟然喺簽約半年後閃電再續約。

謝拉特簽約後表示：「我同家人都好開心，續約代表我嘅努力同投入得到肯定。一開始我已知道呢份工充滿挑戰，亦唔可能一晚內教得好，但呢間球會嘅潛力令人興奮。我明白足球世界係睇成績，亦知道球隊依家嘅情況，不過我好有信心教好球隊，依家需要嘅係耐性。」