熱刺提前放人　比列錫將重返夏德

克羅地亞球星比列錫喺季初膝部韌帶撕裂，由於佢同熱刺嘅合約季尾完結，普遍認為佢已踢完熱刺最後1場賽事，雖然呢位34歲老將仍未復出，但據報克羅地亞勁旅夏德決定提出斟介，熱刺亦願意提早放人，比列錫好大機會重返呢位出道球會。

夏德總監日前自爆有意簽入比列錫，轉會權威Fabrizio Romano周五(19日)證實轉會接近完成：「轉會已經去到最後階段，比列錫好希望重返夏德創造歷史，熱刺亦準備接納夏德外借至季尾。」暫時未知比列錫幾時可以復出，但佢仍為參加夏天嘅歐國盃決賽周而努力。

比列錫曾效力夏德青年軍6年，之後轉去法國展開輝煌嘅足球事業，包括效力多蒙特、國際米蘭同拜仁慕尼黑等大球會，今季季前喺熱刺擔任後備殺手亦表現出色，可惜9月份重傷，悲情結束英超生涯。