賽馬會菁英盃　港會主場挑戰冠忠南區

「賽馬會菁英盃」周日（21日）尾場，A組港會於香港足球會，與冠忠南區正面交鋒。南區上場和波，為鞏固出線席位，今場不容再失。（周日下午4時30分開賽）

港會本季多次在落後之下搶分，前鋒里奧認為有助提升球隊士氣，相信只要球隊保持集中，有機會為南區製造麻煩：「南區實力不嬲都好強，呢排仲有新球員加盟，一定好難踢，所以我哋要踢得硬淨啲，把握僅有嘅進攻機會，咁先有機會喺佢哋手上攞分。」

至於南區，上仗被香港U23逼和後領先第3位的東方2分兼打少1場，為免夜長夢多，是役必定奮力爭勝，主教練楊正光表示要嚴防港會體力化踢法，務求全取3分：「港會踢得好硬淨，所以我提咗球員要踢得Aggressive（進取）啲，去爭贏中場，而且福保羅雖然年紀比較大，但把握力都唔可以睇少，要盡量唔好畀機會佢起腳。」