曼聯U18贏打吡戰　天才中堅成紅魔未來支柱

曼聯今季成績欠佳，但U18小將繼續有出色表現，周六(20日)晚U18英超「曼市打吡」，曼聯U18以1比0擊敗過去4季冠軍曼城U18，今季12戰全勝，紅魔鬼中堅路爾斯積遜射入全場唯一入球，被譽為曼聯一隊未來支柱。

曼聯U18今季表現引起關注，皆因球隊愈戰愈勇，保持長勝，今仗遇上4連冠嘅曼城U18，即使控球率較低，仍然以1比0勝出，12場聯賽全勝，攻入38球只失7球，領先第2位利物浦12分。入波功臣路爾斯積遜賽後喺社交網話：「Manchester is RED(曼徹斯特是紅色)」代表曼聯係曼市一哥。

呢位18歲中堅攻守兼備，曾經被英國《衞報》評選為最值得留意嘅30位英格蘭新星之一，而且對曼聯忠心耿耿，難怪被睇好將來可以成為曼聯一隊隊長。